पाँचौ मनहरी महोत्सवको तयारी अन्तिम चरणमा

मनहरी – २०८० माघ १३ गते । पाँचौ मनहरी महोत्सवको तयारी अन्तिम चरणमा पुगेको छ । मकवानपुर उद्योग बाणिज्य संघ पश्चिम क्षेत्र समितिले महोत्सवको सबै तयारी अन्तिम चरणमा पुगेको जानकारी गराएको छ ।
महोत्सवमा १५० वटा स्टल रहने बताईएको छ । समितिका सभापति एबम् मूल आयोजक समितिका संयोजक गणेशमान मानन्धरले स्टल निर्माणको काम ८० प्रतिशत सकिएको र भोलिसम्ममा स्टेज बन्ने काम सकिने बताउनुभयो ।
महोत्सवमा स्थानीय कृषि उत्पादनहरु च्याउ, केराका परिकार, स्थानीय गहत, मास, मस्याङको बिक्री बितरण र प्रदर्शनी गरिनेछ । त्यसैगरी पश्चिम मकवानपुरमा बाहुल्यता रहेको चेपाङ जातिको संस्कृति झल्काउने घर, नेपालमै मनहरीमा मात्र रहेको बनकरियालाई पनि महोत्सवमा स्थान दिने गरी तयारी गरिएको संयोजक मानन्धरले जानकारी दिनुभयो ।
यही माघ १६ देखि २८ गतेसम्म चल्ने महोत्सवमा राष्ट्रिय तथा स्थानीय सबै कलाकारहरुको तय गरिएको र स्थानीय स्तरमा लोकदोहोरी प्रतियोगिता, नृत्य लगायतका क्रियाकलापहरु दैनिक रुपमा हुने आयोजकले जनाएको छ ।